最喜愛選舉：開篷靚跑非夢想　Z4浪子回頭

最喜愛選舉：
開篷靚跑非夢想　Z4浪子回頭

揀選我最喜愛，老編話可以完全主觀，我認為一生人點都要擁有一次嘅，肯定係開篷Roadster。貼近現實，打工供得起，首選C/P值（性能價格比，簡單講即抵玩值！）超晒班嘅寶馬Z4，外形流麗，性能激情，毋須Chok樣已浪子得相當徹底，且總令人回頭望多兩眼呢！

記者：徐影龍
攝影：黃子偉
Model：姚浩政@GMEModels

貼心設計毋懼寒風

都唔係第一次揸Z4，每次影完相，總是帶有無限依戀。寶馬今年為Z4加入M-Sport套裝，跟M3、M5般，簡單一個「M」章點綴，已流露高性能霸氣。我份人偏向溫文，反而更愛大改款後嘅Z4原始味道，由軟篷改為硬摺頂最抵讚，閂篷時係架雙門Coupe，近乎完美曲線嘅車身，鶴立雞群嘅超長車頭，已經係一架型盡全場嘅跑車。
興之所至，由寶馬陳列室轉入土瓜灣道停燈位時，已急不及待㩒掣玩開篷。硬摺頂20秒內順滑開啟，和暖陽光射入車廂，儘管天氣稍凉，幸Z4擋風玻璃屬前傾式，不單止身邊靚女未覺寒氣入體，連髮型都唔怕吹亂。一邊驅車，一邊享受無限開揚感，風聲及景物高速在身旁擦過，呢種駕駛樂趣，點可能唔令人陶醉其中呢！

■前輪軸貼近車頭，令轉彎指向性極佳。

扭彎指向性極佳

當然，過百萬靚跑Roadster大有所在，但對我嚟講，跟揭中「太平山」一樣屬遙不可及之夢。Z4屬入門級嘅23iA，車價只50萬元，月入兩萬已供得起有餘，仲有硬摺篷，一個價錢嘆齊Roadster同Coupe，算係「理想」而非「夢想」，並非刻意扮公子玩炫耀，真心覺得揸開篷車到郊外暢遊，嗰種駕駛樂趣確係其他車款所欠缺嘅。
當然，Z4亦非脂粉之輩，就算最低引擎配置嘅23iA，馬力都超過200匹，推動1,500kg車身綽綽有餘。最重要係廠方堅持50/50車重平衡，以及頭轆較貼近車前泵把，令到指向性極佳，攻彎時話扭就扭，呢點就係寶馬被人狂讚操控性好嘅原因之一。