最喜愛選舉：慳家又好力　電王

最喜愛選舉：慳家又好力　電王

今時今日的慳家車唔止慳油咁簡單，唔使用油就最啱，架車點郁？用電囉！雖然電動車現階段仍未普及，不過今年陸續有純電動車公開發售，且充電站擴展得越趨成熟，來年絕對是發圍的一年，雖然車款唔算多，不過單係呢部TeslaRoadster，已經令你嘩聲不絕。

記者：趙慧敏
攝影：周旭文
Model：Joanne

要選今年焦點電車王，非美國品牌TeslaRoadster莫屬，將跑車一向被人認為大食又大咬的形象徹底改變，單看數字已知這部絕對是辣電跑，最大馬力達288匹，由0-100km/h，只需3.7秒，性能超越咗唔少Supercar，不過TeslaRoadster並非要行幾步又要你充電那類型，TeslaRoadster充滿電後，最長可行走394公里，每日來回新界及市區幾轉都綽綽有餘，計埋「一缸電」所耗電費只是$52，平均每公里$0.132，比起Supercar每公里是蚊蚊聲般燒銀紙，絕對不能比擬！最重要是零排放，環保之餘，繼續可享受駕駛樂趣。車廠由今年起已直接在香港成立分部，不消數個月，已售出十多部Tesla，部份已經交車，相信明年我們有更多機會發現TeslaRoadster的蹤影。

■賽車桶形座椅，印證電跑都飆得起。

■停車開車，㩒個掣搞掂。

■貼地的車形，令駕駛者有陸上飛馳的感覺。

■電跑沒有波箱，令車廂更簡潔。

■電跑的心臟發動機及電池，全擺放在車尾。

馬力強　MiniE

雖然尚未量產，但MiniE今年亞洲巡迴展中有機會在港亮相，加上車廠安排有興趣試駕的人士試車，令人人有機會一嘗駕駛電動車滋味，確實掀起熱潮。MiniE並非代步車咁簡單，而是拍得住CooperS的高性能車款，電動馬達可輸出201匹馬力、220Nm扭力，最高時速可到達每小時152公里，由起步至100km/h只需8.5秒，充滿電後可行走170至180公里，啱晒香港地方細細的環境。

售價未定

■電動版MiniE車廂保持Mini的趣味風格。

扭力勁　三菱i-MiEV

雖然i-MiEV喺香港出現咗一段時間，不過只限於政府機構及大型企業購買，不過今年代理終於將i-MiEV正式公開發售，令人人都有機會一躍成為電動車車主。相比起Tesla及MiniE，i-MiEV性能上無疑差一截，可輸出馬力只有64匹，不過與i-MiEV相處過好幾天，覺得這部車仔賣點絕非馬力，雖然馬力不算高，但扭力強，加速表現仍十分理想。不過另一個考慮卻是定價稍高，相信並非一般人負擔得起又或者願意負擔。

$395,000

■欠缺轉數錶，儀錶板更加簡單清晰。

混能SUV　CayenneSHybrid

大大嚿的SUV永遠視為環保剋星，不過保時捷Cayenne改變這個定律！今年推出的混能車CayenneSHybrid，被譽為高性能低排放的SUV，配備3公升V6引擎，以及相等於47匹的電動馬達，令總馬力達380匹，不過其耗油量每百公里只是8.2公升，二氧化碳排放則是193g/km，峯值扭力輸出更高達59.1kg-m，並可在低至1,000轉時全數釋放，搭配上8前速TiptronicS波箱，其加速性能之強，與汽油版不相伯仲。

$1,276,100起

■CayenneSHybrid被譽為豪華與環保兼備的SUV。

柴油私家車　AudiA5

就算用汽油車，都係要環保行先。去年Q73.0TDIcleandieselquattro成為香港唯一認可柴油私家車，風頭威到盡！好彩今年都有款A5Sportback1.8TFSI，獲政府認可為環保車，唔會虎頭蛇尾。A5Sportback1.8TFSI明攻環保車市場，低排放、低耗油自然係主打項目，1.8偈可以輸出最大160匹馬力，扭力於1,500轉開始釋出，輸出最多250Nm。據廠方數字，每公里耗油只需$1.05，慳油程度拍住日本房車，但性能高一皮。

$395,300起

■納入政府認可環保車，幫車主荷包慳唔少。