人行突然加息，中港股市齊挫。話「突然」其實唔係太啱，前兩個禮拜已經傳緊加息，不過之後只係加存款準備金率，加息有利有弊，最驚就係利率調高吸引更多資金湧入，前個禮拜人行喺非國內人持有人民幣存款同享受嘅利率作出一啲限制，已經反映加息嘅部署。
資金瘋狂湧入，只有「堵塞」同「疏導」兩招，各有利弊，加息唔使睇得太負面。港股成交好奀，要過埋呢個禮拜市況先至明朗。
東風C輪24673：東風集團（489）報收12.86元，跌1.6%。股價上月中跌勢轉急，噚日靠近250日線終於靠穩，反彈呈十字星收市，連續兩日出現大成交，應該係開始反彈嘅時候，20日線喺14.58元，係第一個目標，可趁低收集隻C輪24673。
隻輪現價19.2仙，2011年6月13日到期，行使價12.88元，溢價15.1%，引伸波幅57%，槓桿率6.7倍（有效3.8倍），正股升上14.58元，24673睇30.2仙，正股跌穿12.20元就沽咗隻輪。
俊樺