有ECup超蓮之稱的妄攝女鍾永慧（Iris）剛成為施念慈旗下藝人，之前在英國留學的她自爆認識不少富豪後代，為不打擾朋友，她決定將Facebook的照片刪掉。另外，公司決定一改Iris之前的o靚模形象，希望有助她在影圈發展，目標是打入內地電影市場。
憑ECup上圍加貌似超蓮，現年23歲的Iris在過去的書展曾推出妄攝寫真，成為一眾宅男的女神。雖然有翻版超蓮稱號，但Iris自覺彼此一點都不相似，她說：「從來都冇朋友話我似超蓮，我自己都唔覺得似。」
怕連累好朋友
問Iris覺得自己還是超蓮比較靚？她說：「好難比喎，即係你問我阿嬌定係栢芝靚，我真係比唔到。我覺得超蓮好靚，自己就活潑啲、鍾意笑。」
原來在英國留學8年的Iris認識不少富豪後代，閒時會與他們玩樂，問她當中有哪些富豪後代時，她就不願多說，她解釋是不想影響到朋友的生活：「我驚啲朋友唔鍾意，同埋我識佢哋時都唔知佢哋係乜嘢人，大家一齊玩唔會問人哋背景，不過家入咗行會小心啲，Facebook入面啲合照一定會刪走去，或者只係for自己朋友先睇到。」
雖然之前的妄攝寫真備受抨擊，Iris卻覺得沒大問題，她說：「呢個概念幾新鮮呀，都唔係負面嘢，只係意識大膽少少，我自己都冇後悔到，不過o靚模呢個稱呼自己就唔係咁鍾意。」
盼攻內地市場
為了一改o靚模形象，Iris透露經理人施念慈會為她接洽不同工作，讓大家知道她有不同才華，她說：「經理人知道我普通話好，最希望幫我打入內地電影市場，家就會接多啲唔同工作，等多啲人認識我。」
採訪：李珮洳 攝影：葉君海
化妝及髮型：Kayte