一班中國小姐噚晚又出現宣傳，佢哋一齊去到尖沙嘴出席慈善晚宴，晚宴中會公佈四個獎項嘅得主，其中包括有「最佳才藝」同埋「卓能最具時尚獎」，呢個最具時尚獎嘅得主，到時會出任評判之一趙世曾旗下公司嘅代言人，唔怪得趙生要親自到場揀蟀。
「佳麗唔可以收利是」
不過日前一班佳麗去到趙世曾嘅豪宅為佢嘅樓盤做宣傳，當日天氣好凍，佳麗要着住三點式現身食啲好簡單嘅午餐，甚至有傳話佳麗幫趙生做免費宣傳，結果趙世曾見到傳媒馬上話要澄清，佢話：「其實我冇規定班佳麗着三點式食晏同埋做平頂儀式，佢哋之前喺我屋企個泳池拍攝，只係趕唔切換衫之嘛，之前叫佢哋着便服都OK，總之唔係我要求。」講到話要捱凍，趙世曾又指自己屋企有暖氣。至於幫手做免費宣傳，趙世曾就表示：「我哋有同大會傾，佢話佳麗係唔可以收利是，呢啲係選美規定。」
雖然噚晚個晚宴喺室內搞，但趙世曾依然戴住黑超，佢話：「醫生話我對眼唔可以俾強光刺激，咁多鎂光燈所以我先要戴咋。」