導遊阿姐幫手執碗，見到鏡頭：「Notme!It'shim！」死命指住Michael（林澄光）。得喇得喇，知道大食的不是你，佢（Michael）去邊都係咁，見慣晒喇！在這個就快除夕的日子，身在泰國，係個食番餐甘的好藉口。雖然對Michael而言，大食從來都毋須理由。
記者、攝影：陳慧敏
鳴謝：泰國政府旅遊局、泰國國際航空、MasterCarRental
坐低先來一打麪！
得喇！「泰國長壽麪」係我應節對號入座安落去的。日本人喺除夕12點前食長壽麪，岩手縣還流行食一啖一碗的一口蕎麥麪，即是隔籬棟到人咁高一堆碗仔，旁邊一路有人逐碗為你添上那種。人在泰國，原來都可以咁玩。
麪如其名，傳統BoatNoodle是船仔流動小販，小船穿過巷子挨家挨戶地賣麪，一碗得幾口，份量小你可食多幾款，每碗廿零匹，你肯定食過。然而在VictoryMonument的本地市集，一碗BoatNoodle只要9Baht，$2.3！平過蛋撻！而走到入小巷，更被那金字塔式，叠到高過個廚的碗山嚇住了：「咁識搞氣氛？」這裏的麪款有魚蛋、豬肉、牛肉同牛雜，可配河粉、金邊粉同米粉，配冬蔭功、清湯或乾撈，簡單若此的配搭，其實湯底才是精華所在，正宗BoatNoodle加了肉桂、丁香、豬皮，最重要是豬或牛的血，煮好後在碗內灑上碎辣椒同炒花生。望落平時食開的BoatNoodle點只咁細碗？起碼三四粒魚蛋，這裏得一粒！牛肉三嚿！加埋麪，四五口就食完，食一打easy執；像Michael將個口擘到最大咁食的話則兩啖，本想食夠36碗應番自己生日，但等影相時又口痕食多兩碗變38！
食夠廿碗大會還送你大汽水一支。隔籬桌幾個90磅唔知有無的90後都吃了廿幾碗。她們說：「午飯時間仲多人，場面好壯觀的！」但我最想問係，間舖到底有幾多隻碗？洗碗嗰個一日要洗幾多隻？收最低工資會唔會好唔抵？
a.TeowReua
地址：VictoryMonumentBoatNoodleAlley，在VictoryMonument地鐵出口，過橋往PhahonYothin路走的那堆大牌檔裏。
自製炭爐Kaya包
離開VictoryMonument，晚上的唐人街永遠最熱鬧。個人愛喫包，加上黃伯會講廣東話，更愛！黃伯的小攤，是個鐵製的炭爐，下層隔着燒得紅紅的炭，烘着上面如山的麪包，包呢，脹卜卜的像餐包，塗好牛油後放在炭火烤爐，顏色金金黃，撕開比海綿還要軟。「55年喇！一路都喺度。」黃伯的手未停，套着厚手套的手在努力翻包，露在口罩外的額頭給烘得紅紅的。麪包有朱古力、菠蘿、泰式Kaya（蛋味較濃）或士多啤梨口味。然後去隔籬左右再添奶茶咖啡，甚至去佢老死，隔籬豬手檔，叫碗Michael最愛的滷水豬腳飯送包又得。Michael：「滷水汁夠濃，燜到啲豬腳入味仲軟腍腍，有豐富骨膠原，靚女們食多啲。」
b.黃伯多士地址：JaeAuanRaatNaa路及Yaowarat路交滙處，BankofAyudhya對面。
營業時間：6:30pm至12mn，周一休。
香濃鼎邊趖
那些沿着Yaowarat路的小販檔幾乎同曼谷一齊發迹。訪問當天下大雨，是大牌檔的大忌！但人流仍然多。我們目標是街頭的鼎邊趖。那本是福建名小食，在台灣發揚光大，在唐人街變晒做泰文，攞地址無能為力，煩請大家認樣喇。那是本來一片片，煮熟後捲成一碌的彈牙米粉狀粉條，在這裏配外皮燒得脆卜卜的燒肉同吃。燒肉其實烤得不錯，不過始終攤凍了，皮厚肉又不算肥瘦勻稱，然而主角始終係那兜鼎邊趖。下了重手胡椒的鼎邊趖，好香，好彈牙，又惹味。油條泡了湯汁熱辣辣，也是食不停。對泰國人而言是「香而不辣」，於是桌面上是一兜兜辣椒碎同酸醋，隔籬枱一下就是七八匙，我食到一半呻住鼻涕被他們看到，被人笑㖭。
c.位置：Yaowarat路街頭數落第二三檔。
殿堂級PadThai
ThipSamaiNoodleShop在曼谷已好出名，出名的卻是其蛋包飯。開業30年，剛開始時只得一張小販枱，一個炒飯只賣6Baht，當年重鎚出擊，一個飯包上兩隻蛋，引來大條長龍，也被冠上曼谷最正PadThai美名。小販檔現已變了舖頭仔，由早到晚都滿座，今日一個PadThai賣50Baht（約$13），比一般小店的30Baht貴咗20Baht，「殿堂級」咁滯。
「最厲害係弄蛋皮的那位小姐！」Michael講咗幾次，他們流水式製作的蛋包飯，一人炒飯，女孩右手一殼蛋漿打下，左手大鑊一搖，紅火間出一片蛋皮，炒飯掉進去，兜兩下蛋包飯即脹卜卜起鑊，七八秒一份上桌，好睇過魔術！上桌的蛋包飯還添了好多香葱同青檸，飯裏是兩三隻巨型大蝦，還有重手的花生、豆芽碎，味道確係香口，最重要是不油膩，下次，一定空肚再來！
d.ThipSamaiNoodleShop
地址：313MahaChaiRd,SamranRatPraNakorn
BoatNoodle
溫馨提示：碗仔麪競食大賽
每年3月尾4月初，在水上市場的DamnoenSaduakFloatingMarketandSweetGrapeFair時，同場都會有「BestBoatNoodles」競食比賽，都係曼谷每年一度熱話來的！
TravelMemo
持BNO或特區護照免簽證。泰國領事館：25216481
3月31日前，泰航假期三日兩夜自由行套票由$2,290起。查詢： http://www.roh.com.hk
1港元約兌3.9泰銖（文中價錢已折算港元）
220V，兩扁腳插座
泰國
曼谷
下周天陰，21-32℃
