八方噚日拎起份台灣《蘋果日報》，赫然見到頭版幾隻紅色大字「今天沒什麼頭條大事」，咁奇？打開再望真啲，下面跟手寫住「比得上催生壹電視！」托底嘅大相係一隻初生BB嘅手仔，手帶上面寫住BB個名，叫「壹電視」。
互動同選擇係關鍵詞
噚晚6點，肥佬黎個baby終於喺台灣呱呱墮地。八方好似訪問元旦BB啲父母咁，問肥佬黎有乜感受？佢話一切啱啱開始，暫時風平浪靜，但佢好明白，呢場仗，好漫長，預咗「一路做一路學，錯咗就改正」。
雖然講到好似好平靜冇乜嘢咁，但肥佬黎亦難掩佢置身喺「世界電視革命風暴中」嘅興奮，仲自言向來係鍾意顛覆既有模式嘅人。佢話，呢場革命以互聯網為基礎，改變過去電視廣播單向嘅模式，互動同選擇係關鍵詞。
因為觀眾可以選擇幾時睇佢哋想睇嘅節目，打破以往電視所謂黃金時間嘅框框，將觀眾由電視節目時間表嘅限制中解放出來，例如以往8點檔嘅劇集，要迎合嗰個時間喺電視機旁邊嘅師奶嘅口味，搞到好似TVB咁，過去20年都一成不變畀啲咁嘅嘢觀眾睇。但家就唔同，要返工嘅人可以喺任何地方任何時間睇番想睇嘅節目，而呢班觀眾先至係有消費力嘅一群。至於呢場革命幾時嚟到香港，肥佬就話：「唔好諗住。」
相對於創辦《壹週刊》、《蘋果日報》，肥佬黎形容今次喺台灣搞壹電視，除咗投資較以往嘅大，承受嘅「張力」亦一啲都唔細；以往搞雜誌、報紙雖然都面對競爭對手等各方面嘅阻力，但今次最大嘅挑戰係NCC（台灣國家通訊傳播委員會）唔肯批出廣播牌照，但佢亦有解決方法，就係向台灣民眾免費派機頂盒「網樂通」。
台言論自由空間收窄
不過，肥佬似乎仍心中有氣，噚日《亞洲華爾街日報》登咗一篇佢嘅來論，大鬧馬英九治下台灣嘅言論自由空間越來越窄，政府控制媒體嘅意圖越來越明顯。肥佬黎承認，呢篇文係為壹電視造勢，但強調所講嘅亦係事實，「我冇詆毀佢，佢亦可以回應，可以辯論。」