最喜愛選舉：霸氣四驅懶理豪華　愛FJ夠Raw

最喜愛選舉：
霸氣四驅懶理豪華　愛FJ夠Raw

四驅SUV漸漸變得豪華舒服，反而實幹型Off-Road買少見少。2010壓軸到港嘅豐田FJCruiser，雖無豪華配備，但Man爆外形加硬橋硬馬四驅性能，似足陳奕迅失聲開Show添沙啞Raw味，難怪佢有東瀛Hammer嘅美譽。

記者：徐影龍
攝影：伍慶泉
Model：LaYing、Betrys@GMEModels　

師奶截車影相

豪華靚車周街有，但論收視，FJCruiser已先贏一仗。平安夜到銅鑼灣世貿走一轉，幾十人圍觀舉機影相，一行國內同胞，大膽舉手截停我，再排隊同架車影合照，呢種吸引力恐怕連林寶拉利都未必做到。

■豐田並非首次採用對開式車門，前後排乘客上落都咁方便。

■雖不賣豪華，但駕駛艙佈局一啲都唔覺Cheap。

■20"巨軨配超厚胎，霸氣同力量感滿到瀉。

■入波棍加Off-Road輔助波棍，揸得勁有佬味。

■尾門掛有後備胎關係，只能採用橫開格局。

東瀛Hammer真材實料

世事就係咁奇，FJCruiser06年已喺北美推出，今年回歸日本正式上架，再以水貨回流香港，趕得及入圍2010我最喜愛筋肉車。車款唔走流線時尚感，反而以高大霸氣、帶點古怪造型登場。五隻車色中，以鮮黃最為搶眼，不論o靚妹定師奶都俾佢深深吸引住。我呢個司機只屬一介麻甩佬，滿嘴鬍鬚不修邊幅，卻跟FJCruiser有點搭調。坐在車內，自我感覺相當良好，全年最愛肯定非佢莫屬。
齋睇車身超過1.8米，離地亦有成244mm，完全唔顧及小朋友或老人家上落嘅便利，就知佢野性難馴。4公升V6引擎步大力雄，380Nm強橫扭力配合獨立四驅及分離式底擔，足應付斜坡、濕濕碎泥路，就算攀爬34°大石陣一樣無問題。最正係支輔助波棍，全世界一窩蜂改為電子旋扭式，佢偏偏玩番機械式轉Mode，行車中途仍可轉入HiMode或LoMode，應付唔同嘅路面。揸住車不停玩雙棍咁有型，張如成都變郭富城啦。