假期氣氛濃厚，港股平安夜半日市只有236億成交，恒指下跌69點，報收22833，雖然又向下拋離10日及20日線，但係距離仍然好近，技術指標亦冇大幅轉壞，仍然以整固格局睇。
短線支持位上移到22600，呢個禮拜只得3個半交易日，睇嚟大市都會好靜，期指結算相信會集中喺轉倉活動，至於恒指會下試22600定係上番23000樓上，就要睇花旗股市嘅表現。
昆能C輪27361：昆侖能源（135）上日報收12.42元，升1.6%。之前喺高位橫行幾日之後回落，下試20日線後企穩，已重上10日線，要特別留意嘅係半日市成交都增加，動力增強，短線應該會試13元，破位睇14元，可以諗吓隻C輪27361。
隻輪現價18.5仙，2011年9月26日到期，行使價12.88元，溢價18.6%，引伸波幅47.8%，槓桿率6.7倍（有效3.7倍），正股升上14元，27361睇28.1仙，正股跌穿11.70元就沽咗隻輪。
俊樺