無綫越做越慳皮，早幾年開始上去做節目嘉賓已經冇車馬費收，只係會送番份紀念品畀嘉賓，近年無綫更縮皮到只係送個價值68蚊嘅TVBuddy硬膠公仔。雖然有傳TVBuddy係六嬸方逸華設計，但慳皮成咁，啲嘉賓梗係唔多happy啦！
笑得好牽強
好似關寶慧咁，早排佢幫司徒法正喺無綫生活台嘅《詭異檔案》節目做嘉賓，結果收咗個TVBuddy公仔。寶慧好友姚樂怡日前喺微博貼咗寶慧捧住TVBuddy笑得好牽強嘅相，仲話：「今日關寶慧上TVB錄影節目，酬勞是這隻公仔，她很高興！」
身為無綫合約藝員嘅曹永廉就話：「我哋可能將來出糧都係畀公仔咋。（擔心）」寶慧回應道：「有硬膠TVBuddy，包你全家好happy，仲冇被屈嘅感覺㖭。」
放上網拍賣
雖然寶慧口口聲聲話收到TVBuddy好高興，但字裏行間令人覺得佢講緊反話。噚日馮仁昭打電話畀寶慧，佢話：「哈哈哈！我真係好高興噃！TVB好多年前已經冇車馬費o架啦！個TVBuddy好多人搶住要o架，我諗住遲啲放上網bid㖭！其實微博嗰幾句說話係我朋友幫我回應，唔係我本人講o架！」