香港人堪稱「奶茶精」，每年飲嘅奶茶高達10億杯，而且成功籠絡遊客嘅歡心，令港式奶茶成為香港特產。奶茶好飲，冲茶者嘅技巧係關鍵，首屆國際金茶王大賽冠軍羅德師傅冲嘅奶茶可以力壓海外對手奪冠，質素毋庸置疑，有好嘢自然要分甘同味。商務及經濟發展局局長劉吳惠蘭日前就應羅師傅邀請，相約包括「星之子」陳易希在內嘅幾位年輕發明家去羅師傅嘅茶餐廳嘆茶。
唔好睇小一杯奶茶，其實冲調上都好講究。羅師傅話要調校一杯正茶，除咗要茶葉、奶、糖、火候、時間同冲茶手法各方面都配合得宜，最重要係「用心」，而羅師傅嘅冲茶絕技亦令現場所有人讚不絕口。劉吳惠蘭就借奶茶說教，話港式奶茶品牌嘅誕生正正源於每一代奶茶師傅嘅默默耕耘，以個人獨特創意同風格用心調校，先創出迎合顧客口味嘅香港品牌，呼籲有心喺創新科技上發展嘅年輕人同樣用心咁追求夢想，強調當局會予以適當支援。