侯利亞之前教利物浦，畀紅軍球迷喪插，今季教維拉，似乎都冇咩改進；周日英超尾場主場對熱刺，侯利亞就排個怪陣，有經驗嘅柏杜夫及李奧曲卡唔用，放喺後備席；反而用兩個o靚仔莊拿芬賀治同戴爾夫打中場中路，結果中場個勢就輸晒。
熱刺為咗爭上前四，當然唔客氣，中場雲達華治對住呢兩個o靚仔，又點會食唔住，上下半場冷靜咁射地波各建一功，就算迪科爾批踭攞紅牌，都仍然領先2:0；打多一個嘅維拉，要靠馬克艾拜頓82分鐘至破蛋，但避免唔到輸波。得到侯利亞排怪陣讓半臂，熱刺贏2:1，7場聯賽不敗，上到第5位。場波臨完場仲有嘢睇，後備入替的維拉中場皮利斯，喺場邊同熱刺領隊哈利列納發生衝突，互相指罵，老皮37歲，哈利列納就63歲，兩個人加埋成百歲，好心就收吓火啦。