噚日《中國新聞社》爆料，話今年重開嘅中國羽毛球超級聯賽，好多參賽隊伍同贊助商都唔妥李寧（圖），因為李寧涉嫌打「霸王波」！
哦！原來係講緊李寧（2331）嘅體育用品。話說國家隊規定，所有參賽嘅國家隊成員都要着李寧衫、用李寧球拍、着李寧波鞋、用李寧袋……總之，除咗唔使個樣變埋李寧之外，乜都要用李寧。問題就發生喇……
有個體育器材用品商好激氣咁話，家成個聯賽選手都唔夠100人，裏面有幾多個唔係國家隊先？佢哋做贊助無非都係為咗想啲產品可以曝光，國家隊規定個個要用李寧，即係唔想佢哋玩啫！
佢又話，雖然內地CBA都有類似條款，但係有個別球員用錢擺平咗，搞到羽超成為特例……查實以前無人肯贊助嗰陣，咪又係得李寧頂住，點解嗰陣大家又唔出聲呢？