懲教署出年取消懲教助理升職嘅中文筆試，過到口試就有機會申請內部升職。近年轉戰娛樂圈嘅喬寶寶，入行前喺懲教署做咗16年二級懲教助理。印度裔嘅佢喺香港土生土長，講到一口流利嘅廣東話，但識講唔識寫中文。佢接受無綫電視新聞訪問話，監倉有好多非華裔囚犯，少數族裔嘅懲教助理可以幫到唔少前線工作，不過要佢哋過到中文筆試，升職機會幾乎係零。
有得做冇得升，喬寶寶覺得制度勁唔公平，仲話一班非華裔同事一早反映過不滿，喬寶寶等到冇癮，四年前索性轉行。懲教署家有超過5,000個職員，大約50人係非華裔，2000年開始內部升職要考中文讀寫考試。懲教署話今次簡化內部升職程序，純粹為吸引有上進心又做得嘢嘅同事申請升職。