臨近年尾，又係回顧過去的時候，今年車壇推出的靚車多到眼花繚亂！我哋一連五日，將帶大家回顧過去一年的車款，更揀選各車款中最喜愛的型號，雖然結果唔代表全港市民意見，不過入得我哋五強都有實力！首先出場的是最受注目的七人車！
記者：趙慧敏
攝影：陳盛臣
Model：Betrys@GMEModels
七人車最受注目
大家以為打頭陣嘅一定係只可遠觀的超級跑車？咁就錯了，近年日系的七人車反而成為大家最注目的車款，揀架「黐家車」來展開今年回顧，唔係私家車，係日系「黐家車」，諗都諗到即係平日可以載一家大細的私家車，條件當然要經濟實惠又好使至有資格進身「黐家車」之列。
冠軍
Mazda5 實用行先
講到今年我最喜愛的「黐家車」，非Mazda5莫屬，剛轉款的Mazda5，簡直令人有眼前一亮的感覺，尤其是流水狀的線條，完全切合廠方玩「流」的主調。不過除了美態，實用性亦一一兼備，6+1座位設計可靈活摺合的功能，鋪排充滿靈活性，除了載足一車七人外，上落的電趟門，都受家中大小歡迎，最後當然離不開價錢，咁顧家，都要顧住荷包，入門版只是二十萬元多一點，對一般家庭而言，真係好吸引呢！
亞軍
日產Elgrand 夠靜夠豪
又是另一款七人車，不過就屬豪華級數，今年登場的第三代Elgrand，以寧靜及豪華為賣點，廠方刻意減噪音，採用前方隔音擋風玻璃及YokohamadB吸音輪胎等，將風聲、路噪等雜音隔得一乾二淨。豪華賣點除了超大的車廂空間外，全球首創肩膊式第三摺位，頭枕亦可自由調校，加上有Ottoman皇帝椅，座椅都可當正大床瞓一覺。
季軍
豐田Noah MPV稱王
近年成為MPV銷量冠軍，反而係車仔細細，成架麪包車咁款嘅Noah，咁受歡迎都係嗰句：「經濟實惠。」中排座椅180度迴旋功能已夠方便，加上兩公升引擎所輸出的158匹馬力，除環保節能ECO模式於開車時會自行啟動協助慳油，還背上廠全新研發的Valvematic引擎，動力與慳油功能喺晒度，每公里油耗只係$1.1左右，怎會唔令人更愛它一點。
其他入圍者
本田Stepwgn慳油王
銷量由年頭旺到年尾，因車身內外至性能都大革新，當中的1.4米天幕已嚇窒你。輕按EconMode，波箱、空調及引擎維持最低耗油，油耗大大減低。
豐田Wish 兩版本任揀
Wish一推出就有兩個版本2.0及1.8，兩者換上王牌Valvematic引擎，輸出144匹馬力，油耗更降至16.7km/L，加上外形充滿潮味，啱晒潮爸爸。
