亞洲遊戲展撞正聖誕檔期，人流旺爆，但估唔到，除咗宅男宅女，連六嬸方逸華都去湊熱鬧。可能驚人多，六嬸噚日10點幾同埋兩名助手，去到會展行街街。兩個助手就猛咁阻住啲市民影六嬸，好似驚死六嬸被嚇親咁款。不過，六嬸最終都係冇消費，成朝都係得個睇字。
試戴立體眼鏡
八方噚日喺微博見到Sony市場部總經理項明生無啦啦有張同六嬸嘅合照，於是八個究竟。聽講噚日朝六嬸行到Sony個舖位係咁睇，對當中PlayStation3最新嘅GT5賽車同埋一系列Move嘅NBA體感遊戲，都好有興趣，係咁問職員GT5個軚盤點用，啲體感遊戲點玩等等。不過，六嬸可能顧住儀態，睇咗10幾分鐘都冇試玩。
貴賓駕到，項明生即時同六嬸影張合照。八方問項生六嬸對乜嘢遊戲有興趣，佢話六嬸除咗對啲games有興趣之外，仲好鍾意3D嘢；六嬸戴住個立體眼鏡，睇到Move女孩跳SINGSTAR，仲問除咗LadyGaga嘅歌之外，有冇YMCA呢首舊歌，想話用嚟送畀小朋友做BoxingDay禮物喎。