家做高官，整返個網誌差唔多已經係指定動作。天文台長李本瀅連平安夜都不忘喺網誌發表文章，題為《白夜》，講佢有一年6月到俄羅斯聖彼德堡，由於夏至時分太陽位於最北位置，北半球高緯度嘅地方太陽好遲先下山，所以冇黑夜。然後筆鋒一轉，就講到杜斯妥也夫斯基嘅短篇小說《白夜》，但就有少少屈機，整理咗小說故事主線出嚟就當交貨，話「讀過這小說，你會明白為何它曾多次改編走上銀幕」，完全冇講到佢嘅讀後感，只係話可參考維基百科。
不過，點都好過民政事務局局長曾德成嘅網上專欄，繼續抽「香港精神」水，佢以《香港人精神大彰顯的一年》為題，回顧今年廣州亞運中香港運動員表現出色等等嘅人和事。講來講去，曾德成對申亞都係死心不息。