吳綺莉與成龍所生的卓林（小龍女）雖然在單親家庭長大，但卻繼承了父母的演藝細胞，前晚在鍾慧冰家舉行的聖誕派對上，小龍女就表演扮動物聲助興。吳綺莉好友林建明（沙姐）昨大讚小龍女有表演天份：「佢叻到不得了，冇人教佢，但扮乜似乜。」她又指小龍女懂四種語言、懂事乖巧，令吳綺莉深感安慰。
吳綺莉早前在上海搞個人畫展，並首次帶同她與成龍所生的11歲女兒吳卓林（小龍女）亮相。已定居上海的吳綺莉，今年還帶小龍女回港過聖誕。前日聖誕，吳綺莉及女兒就與林建明（沙姐）出席在鍾慧冰家舉行的派對，有份出席的洪羅拔昨將照片放上微博，其他出席者還有80年代名模古嘉露、文雪兒、斑斑、文素、朱潔儀、寶珮如與未婚夫Matthew，曹央雲及其女兒等。
教訓大姐明
沙姐丈夫曾展章是吳綺莉母親的契仔，吳自小就叫曾做契哥，所以沙姐與吳亦很熟絡。記者昨致電沙姐，她說前晚特地帶吳綺莉母女出席派對。問小龍女是否首次在港過聖誕？沙姐說：「唔知喎，同我就第一年，佢好開心，識咗好多新朋友仔。噚晚（前晚）我哋每個人都要表演搞氣氛，佢（小龍女）好叻，扮任何動物都似到不得了。」問小龍女是否很有表演天份？沙姐說：「係呀，佢幾歲開始喺我屋企已經扮乜似乜，冇人教佢，天生嘅。」
再問沙姐小龍女是否很有天份加入娛樂圈？她說：「唔知，讀完書先講啦。佢好好笑o架，嗰日我同佢睇《與龍同行》，啲記者訪問完我，佢竟然話：『你頭先做訪問，一路食爆谷一路講嘢唔係幾好，好樣衰o架，最緊要靚嘛！』我問佢覺得自己做得好唔好？佢話：『起碼冇你咁樣衰！』」
識四種語言
沙姐續說：「睇騷時佢問我點解個籠下面有條軸，我就詳細啲解釋，點知佢話睇緊嘢唔好講咁多嘢，畀佢吹脹！佢好好玩、好可愛！嗰日仲畫咗幅畫畀我㖭，佢畫畫好有天份，仲識廣東話、普通話、上海話同英文，所以綺莉好開心。雖然個女係單親，但佢咁叻咁生性，綺莉都好安慰。」另外，古嘉露婚後專心湊女，而文雪兒則經營美甲店。
採訪：戴彩煥
