丟低個女喺黑龍江　同GaGa蒲星吧

今年理應唔憂聖誕無白色。向西看，歐洲一早就灑滿厚厚白雪等住過聖誕，可惜有機去未必有機返呢；向東看，日圓就嚟摸到十，比舊年貴兩成喎！向南看？你要先惡補一下地理。剩番向北，韓國？唔好以為避彈衣可擋到飛彈。我係話中國東北，吓？！

記者：步驚驢　
攝影：步驚驢、ClubMed
鳴謝：ClubMedYabuli

點解亞布力？

你知唔知佢喺邊：亞布力位於黑龍江哈爾濱市東南與牡丹江市之間。但係，點解要去亞布力滑雪先？答案簡單：中國最佳滑雪場囉！仲舉辦過亞洲、國家冬季運動會，連中國國家滑雪隊集訓基地也設於此，夠說服力未？仲有，滑雪場18條滑雪道集入門、進階、高手、高高手不同程度。最抵讚係有條纜車直通山頂，車廂簇新兼有暖氣，唔使零下廿度坐上山捱冷風，連唔滑雪者都可上山睇風景。仲有，東北冬季特別長，11月落雪落到第二年4月，癲起嚟成5個月雪期！

■magiccarpet將小朋友連教練安全送回起點。

國內首家ClubMed

其實仲有個最大的誘因，就係中國第一個ClubMed正式落戶亞布力！一嚟就踩入東北苦寒做skiresort，且是集團在亞洲繼北海道之後的第二個，兩者仲同級！我同你都好奇：植入內地的ClubMed會否變成西洋肉身、中國靈魂？
先談肉身，這是個半唐番。ClubMed事前考察亞布力一帶時看中一個原有物業，出自加拿大建築師手筆，因而建築本來就跟周邊的不同。接手後再經翻新，11月底正式開幕，成為國內首座國際級skiresort。因此，乘車進入resort時會有一個奇異體驗：車窗外沿途是詭異青BB霓虹鑲邊的各式「山莊」、「貴賓樓」，零下廿度睇見立即凍多兩錢。然後突然換成是紫夾橙黃的溫暖燈光，兼歐式碎石外牆的酒店建築，「國土」氣息即時消失。撇除周邊的煲冬瓜，我曾經忘卻自己身處內地。不過咁，若論靈魂，我是指G.O.（GentleOrganizer）和氣氛，則跟其他地方的仍有距離，始終是中國人：沉穩、內斂，點會一夜之間變成整日naturalhyper？或者因此，這裏約三成G.O.來自世界各地，自動波識得娛樂大家。假以時日，相信可感染埋本土的G.O.。

■來自遼寧的滑雪愛好者。

■山頂超凍，頂唔順可入餐廳飲杯暖笠笠咖啡。約$41

一個上晝細路識掟彎

對我來說，ClubMed最吸引是「一口價全包」，唔使左計右度都唔怕失預算使大咗。亞布力ClubMed一樣，任飲任食兼包住之餘，仲包學滑雪，分不同程度，唔理係初哥定高手，snowboardorski，都有合適課程。小朋友嗎？一樣「尾溫鐵」！晨早一行10個小朋友換好晒滑雪裝備，跟住教練走到滑雪道上先做熱身，然後聽教練講解：「只要將重心放右邊就可左轉……」小朋友眼見教練誇張地將上半身挨在右邊腿上，然後逐個輪住做，又真係全部做到兼無仆親……一個上午，小朋友經已可掟彎兼煞停，我等學極都未識的登時無地自容。

價錢：租用全套滑雪服連頭盔、雪鏡、手套全日約$235

仔女玩乜：室內倒掛臘鴨

上晝學完要急急腳接番個細路？未必！教練會帶埋你的小朋友去食飯，下晝再出雪地練習。如果小朋友唔鍾意滑雪，你都可將佢放喺MiniClub，喺度有哥哥姐姐全日同佢玩，環境仲幾安全，連粉筆都用無毒的，擺入口都無問題。又或者參加興趣班，例如功夫，我見兩個外籍小朋友練得落力，反觀內地小朋友就得過且過；又例如舞台表演，小朋友齊集在ForestBar的舞台前，由G.O.指導排舞，為晚上8點半開show而努力，舞曲當然唔少得《Nobody》，連兩歲未夠的妹妹都可戴上喜羊羊帽上台擰兩擰；或者去玩resort的招牌武器：空中飛人，今次首次移師室內，可以暖笠笠「倒掛臘鴨」……咁為人父母者呢？難得撇下細路當然出雪地滑夠本啦！

■彈床可彈到六七米高，小朋友最唔識死，玩空中飛人最夠放！

■見細路太興奮，導師會出手制止的！

■其中一晚，舞台專為小朋友而設。

■MiniClub有姐姐全天陪住小朋友。

大人玩乜：打牌按摩又唱K

「差不多4點了，要回去啦！」吓？鬼叫冬天日頭早收，滑雪場又不設夜場，只能早早返房，用房間的浴鹽浸個熱水浴消除疲勞吧，因為夜晚仲有大把嘢玩。resort設有兩個酒吧：ForestBar和StarBar，前者就在小朋友大跳《Nobody》的舞台前，梳化、座地燈都甚有設計味，地方較casual。StarBar，就較wild，有人會扮LadyGaGa喺門口同你影相，入場見唔知幾角星形的bar枱，中央高高舞台上G.O.跳得落力，台下個個跟足擰頭擰髻，似足落D，仲要啤酒紅酒cocktail任飲。計我話ClubMed唔止啱family，一班滑雪友都可玩到癲。