財爺曾俊華近年好鍾意拍廣告推預算案，不過最近嗰輯「二撇雞」，聲勢就唔及上年嘅「神出鬼沒」篇，特別係冇咗財爺除低劍擊面罩笑淫淫個樣，惡搞吸引力大減。噚日財爺喺自己個blog度就大談自己嘅劍擊史，又話母校喇沙劍擊隊今年奪得佳績，佢都有份教劍，曲線抽水讚吓自己有料到。
喇沙教劍廿幾年
財爺話，打西洋劍係「喇沙仔」傳統，佢細細個已經覺得劍手look型到不得了，可惜入學冇耐就去咗美國，惟有喺嗰邊接受正式訓練，後來仲得到意大利老師傅指點，學晒啲劍法步法，到大學畢業，母校麻省理工學院（MIT）即刻請咗佢做助理教練。佢話，其實劍擊唔係睇落有型咁簡單，係體能、技巧到精神意志嘅磨練，因為決戰時，講求精神集中同冷靜，最勁就係做到手中冇劍、心中有劍嘅境界。
佢又話，八十年代返港之後，逢禮拜六下午得閒就返喇沙教劍，一教廿幾年。連家喺喇沙做教練嘅，都係佢教過嘅第一批學生。而今年佢班徒孫，喺港九地域中學校際劍擊比賽，贏到大滿貫同連續第六年全場總冠軍，係喇沙歷來最佳成績，佢作為師公，都好欣慰。