聖誕節假期，揀碟睇當然唔好揀套打打殺殺，今個星期煲咗隻《情約心灣》，意外地有Feel，靚景加上故事好，適合一班朋友圍埋一齊感動，過個溫馨假期。
記者：許福合
小說改編
睇碟之前，先講吓《情約心灣》古仔來頭都唔少，原著小說《TheDeathandLifeofCharlieSt.Cloud》，在2004年發表時大受歡迎，曾繙譯成15種不同語言。
故事講ZACEFRON飾演查理，在一次交通意外中，弟弟喪生前，查理曾保證不會離開他，但最後查理被救活弟弟卻死了，於是查理一生改變了，他成為墓園管理員，放棄了大學和親朋好友，陪伴弟弟之魂。女角泰絲熱愛航海，當她走入查理生活之時，卻要在一星期後離開獨自展開環遊世界航海之旅，查理能否勇敢地去追求泰絲呢？
與靈魂溝通
其實，睇碟中途，甚至睇完全片，可能都會有個疑問，就係查理是否真有與靈魂溝通嘅能力？導演BurrSteers明顯有意引導觀眾，既覺得佢真係睇到靈魂，又可能只係意外發生後的創傷後遺症，留給觀眾一個想像空間；另外，電影中另一個賣點，就係心曠神怡嘅靚景，大部份畫面在風景優美的三歡群島附近取景，睇落特別舒服。
Bonus
情迷靈異國度
ZACEFRON比起《歌舞青春》嘅演出，更加有感染力，而且導演處埋鏡頭流暢，劇情與畫面都處理得相當好，可惜女角演出就有啲嫩，差些少啦！睇完正場記得睇埋Bonus，都算係幾豐富，除咗常見嘅刪剪片段同導演解說外，仲有追蹤ZACEFRON，可以了解佢嘅拍攝情況，另外走入超自然國度亦都幾有趣，不妨睇睇。
$225 （BD）
$125 （DVD）
