有人寫稿，喜歡多加英語在中文之後，為何如此，有兩個解釋，一就係中文名詞源於英文，為免誤會，加埋英文在後，以免讀者睇唔明，第二就係表演啦，當自己係讀者嘅英語老師。退休人士Ｐ睇稿睇得周到，兼且有時間，久唔久就寫信俾一位作者：「喂，你可能引錯咗英文喎？」其實呢啲錯誤可能係手民之誤啫，是故作者唔睬退休Ｐ。好難講嘅，依家未必有校對，有校對嘅話，人工未必高，睇漏英文串錯字，唔好勞氣。
大編輯請校對，好耐都未請得到，卒之有人應徵嘞，申請人有高級學位，大編輯又唔敢請咯噃，驚住人地做唔耐吖嘛，所以到依家為止，佢親自睇住一啲重要稿件，自己做埋校對，真係做到金睛火眼，返到屋企，有時瞓唔着覺㖭！將以上種種解釋俾退休Ｐ聽，佢表示諒解，但隨即又拎出一封投訴信俾左丁山睇，係佢寫嘅，話作者將rocktheboat變成中文「用石頭鑿船」，佢話：「點會係咁嘅意思呀？」左丁山唯有苦笑。
英文並非我地嘅母語，講寫英文好好嘅人，偶然都會犯錯。譬如陳方安生，前任現任高官之中，陳太英文公認冇得彈，但最近就俾褚簡寧捉到一個錯處（頭條日報，十二月二十一日）。陳太講政治改革，批評政府政改方案誤導，HongKongpeoplehadbeenlulledintoafalsesenseofcomplacency。褚簡寧認為不妥，佢又問過好多以英語為母語嘅人士，一致認為陳太應該刪去"afalsesenseof"呢四個字，雖然大家都明白陳太講乜，用多四個字都唔算係好英文嘞。
我地話識英文啫，其實係半桶水，故此每次見到褚簡寧，就向佢請教。其次問佢嘅中文譯名個名點樣嚟嘅呢？將佢嘅姓氏Chugani，譯做褚簡寧嘅仁兄仁姐，一定係高手，你叫左丁山譯嘅話，就會寫成「朱簡尼」囉。米高話：「當年我移民美國，住在華盛頓，一稿兩投，英文稿俾南華早報及信報，信報幫我譯成中文，總編輯沈鑒治先生為我譯名，就叫做褚簡寧。」唔怪得，沈先生學貫中西，先至諗到咁好嘅譯名，唐太宗時有名臣褚遂良，依家就比較少人姓褚。