金利來（533）息高、PE低，成衣股當中仲係好抵搞。集團2010年半年度（6月底止）純利升37%到1.6億銀，Keep住唔錯嘅雙位數增長。雖則金利來今年3月已經結束晒所有香港零售業，但祖國強勁內銷動力，繼續為集團帶嚟唔錯增長。係咁意計數，金利來連物業增值收益，2010年度純利增長20%到3.5億銀，預期PE得番9倍單位數。家陣主打祖國成衣股，PE閒閒哋都上到15至20倍，金利來平咗一大截。
又金利來現價息率回報保守講緊5.4厘，已經好吸引，下半年業績好，集團增派末期息，到時息率回報仲高。再講，金利來手頭淨現金近8億銀，超級現金牛防風力特強。買金利來，以2010年度13倍PE做目標，金利來要見4.73元，潛在回報率43%。
第一上海NAV折讓大
第一上海（227）最新每股NAV1.86元，現價（1.12元）折讓近40%。呢個折讓，仲係未計入集團資產重秤升值因素，證券股當中，第一上海折讓水位好吸引。此無他，呢期唔少證券股開波兼一支箭升，第一上海就掉頭調整，兼跌到近半年低位，殘到痹。呢轉短打，吼實第一上海1年橫行底部1.04元兜轉，博集團升20%到1.34元，都未有耐上到NAV水位。
錢雋