煲呔扮潮人，包咗MCJin幫佢作咗首擦鞋Rap歌，聖誕流流喪叫起錨。呢種極醜惡嘅行為，唔單止辣㷫網民，連音樂界都發出怒吼。網民惡搞MV不斷出現，最新力作嘅係《福佳始終有你》班底林忌等嘅LorryJean×BowTiehiphop聖誕歌《超錯2010》，歌詞草根得來反映時弊，咁先係Rap嘅精神。DJ教父UncleRay亦睇唔過眼，喺blog寫咗篇《MCJin，你起乜嘢錨？》。煲呔有今日真係唔衰攞嚟衰。
「上年麥兜死咗」
《超錯2010》個MV擺到明係完全參考煲呔個chok樣聖誕MV，過去兩日喺YouTube已經有過萬人次瀏覽。歌詞好正，好似「香港人起錨去救劉曉波都好過聽你唱歌」，仲有連珠炮發數落煲呔嘅「拒絕平反六四超錯聖誕權隻弱智歌超錯官商勾結夠未？超錯！香港笨實行騙區 政府超錯！」
除咗福佳班底，RapperArhoSunny亦作咗首《起錨咪搞XmasMix》，歌詞亦係句句抵死，例如「新嘅一年唔想聽見起錨兩個字」、「上年麥兜死咗 今年再嚟垃圾歌」、「下次洗腦，唔該唔好咁老土，唔係玩親Rap就係潮流始祖」。
UncleRay鬧擦鞋
唔單止網民同Rapper不滿hiphop精神被扭曲，連德高望重嘅港台DJUncleRay日前亦喺佢個blog度寫咗篇《MCJin，你起乜嘢錨？》嘅文章，話政府叫MCJin作歌賀聖誕本來無可厚非，但係聽完首歌覺得相當「無厘頭，兼有濃厚擦鞋feel」。首歌不停叫人起錨，UncleRay話真係唔知起錨同聖誕節有乜關係。首歌起錨次數仲多過聖誕，明顯有政治目的。UncleRay又話煲呔笑容生硬，握拳時似機械人，對呢個政府宣傳冇好感。
《超錯2010》（節錄）
詞:林忌/（banky）/行內人/福佳歌星群
香港所有高官 超錯！
聖誕權個弱智款 超錯！
官商勾結夠未？ 超錯！
香港笨實行騙區 政府超錯！
狗up希望我啱聽
平時睇新聞笨實聽到你個名
上網search吓又有福佳曾蔭權
多謝李生同特首最有緣！
玩特權政界商界要啱Feel
Rap得唔好聽希望我哋唔掟蕉
官商勾結包冇搞錯
香港人幾時有開心過？
……
高鐵669億？ 超錯！
申亞551億？ 超錯！
講民主又玩失憶？超錯！
香港笨實行騙區 政府超錯！