"澳職唔怕noshow捧獅吼"
去過唔少次英國，試過兩三次喺12月出發，凍得嚟都冇今年新聞報道所見咁惡劣；興致勃勃部署幾個月去到，碰啱場波改期，揸住張價值不菲既倫敦球會波飛，真係會欲哭無淚。凍還其次，冬天啲舖頭晨咁早就閂門，冇乜好行先係近年少會冬季去朝聖嘅主因。留學海外，都懂得乜嘢叫獨立，又唔係打仗又唔係外星人打到嚟，揸住張機票又唔會白蝕，點解返遲香港度假兩三日冲少一兩日凉嘅大少小姐，好似劫後餘生咁？政府想用包機幫到佢哋返嚟過節，但幫唔幫到佢哋逆境成長呢？英國冷鋒未過，好似上個周末嘅英國波改晒期咁滯，都唔知令到大家幾失落；冇咗娛樂，度好心水回水都冇癮啦。今日日皇盃軍情未明，焗貼小注鹿角當跨日過關；忍得手者可留子彈聽日買澳職，希望唔會直播波都改期。榜首獅吼今季長勇，唞夠返主場，點會怕名氣兵黃金海岸聯，單W捧主隊，望先拆一個小禮物。
"信富咸軍紀早場騷W"
講開去英國，10多年前聖誕節期間去，還記得25日晚去倫敦好熱鬧嘅李斯特廣場hea吓，見到當時效力車路士嘅後衞拿索斯仲同女伴，孭住一袋袋戰利品逛街happy；拆禮物日大賽當前，雖然聖誕應該普天同慶，但球員也應有一定嘅自律，未知是否有影響，記憶中在翌日車仔就爆冷被溫布頓逼和。今天早場，倫敦迷你打吡富咸迎韋斯咸，兩隊搶分護級，信富咸班主老阿法耶茲仲好緊張球隊，信曉士軍紀會遠比由格蘭領軍嘅韋斯咸雜牌軍好，富咸今季主場勝率低都要捧。
"侯利亞聰明賓帥做騷？"
呢排嘅政治騷、政治迫害成新聞熱話，真假有誰知？世界球壇上，賓帥狂言博得意大利國米嘅班主莫拉堤，捧咗世冠盃都要聖誕前請佢食無情雞；以賓帥履歷，冇理由唔識做擦鞋仔博上位，冇理由勞氣到失言得罪老細。教得唔開心，捧埋個盃借啲意博炒有補水，又唔怕搵唔番份工；其實國米部份主力年紀唔輕，摩帥上季都用得好盡，今季走樣又未必賴得晒賓帥。賓帥專登又好，戇居又好，但另一位前紅軍領隊侯利亞，今季教維拉又冇咁多是非，主力唔聽話，用班博上位新人又踢得幾好，穩守突擊，聽日尾場唔信熱刺作客讓得起，和波兼博主隊[+1]啦。
"紐記冰騷鎮曼城大款"
出番祖爾巴頓同路蘭，紐記唔同晒，前周打到利記落花流水；今次迎戰更大牌嘅曼城，賠率仲係咁冷，啱晒我胃口咯。曼城上仗在零下嚴寒天氣，主場照輸俾愛華頓，睇吓部份非洲同南美兵好似頂唔順喎，今次上更北嘅紐記，鬼叫你超高薪，頂硬上啦，我就必捧紐記冷W加入球「大」。
"魔獸又騷哥利？博入球「大」"
阿仙奴恐強症，但嚇唔怕莊家後天英超本輪大戰開平手低水，招呼近年有杜奧巴、阿仙奴就贏唔到嘅車仔；雲格唔買守將，但條防線家好難唔失波，呢場阿仙奴唔會好似輸俾曼聯時咁保守，再輸乜面都冇，博一鋪以攻為守，「大」偏冷可捧。
蘋果波神
語錄：拆禮物日大賽，感覺上捧主隊安心啲，起碼食聖誕大餐，都冇客隊咁頻撲啩。