【本報訊】商場聖誕裝飾美麗，想用數碼相機或手機拍低靚人靚景，效果卻未必人人滿意。其實只要掌握幾個簡單技巧，無論拍人、自拍，都可拍得出色，如與巨型聖誕樹合照，最緊要識得學MJ！
DCFever網站總編輯韓志成（Jeffrey）表示：「好多人見到大大棵聖誕樹或者公仔好靚，就即刻黐埋去影，咁已經錯咗。」Jeffrey說，以巨型聖誕樹作背景時，被拍者應靠近鏡頭「影半身」，身體還要像MichaelJackson的招牌舞蹈動作一樣，向前微傾3度，「咁攝影師低炒時先至影得你靚，唔好只係垂低頭，咁就摺埋咗條頸」。
室內選「夜景人像」模式
商場是室內環境，Jeffrey建議用小型數碼相機的市民選擇以「夜景人像」模式拍攝，但攝影師必須手定，而被拍者亦要注意，在閃燈亮過後仍維持原有動作一至兩秒。
想用手機自拍大頭相放上facebook，背景難以入鏡，Jeffrey建議戴上聖誕帽等道具增添照片氣氛。而由於手機自拍一般都不開閃燈，光源不足，因此要懂得「偷光」，商場入面廣告燈箱同化妝櫃枱都有好強嘅白光，可以行埋去，面向光源自拍，咁啲相就會有好均勻同柔和嘅白光」。