天主教香港教區榮休主教陳日君樞機原來童心未泯，一講到美食就流露出小朋友嘅天真儍氣。話說陳樞機擔任港台清談電視節目《品味人生》嘅頭炮嘉賓，同觀眾分享佢嘅人生經歷，講到近年為咗健康着想、幾鍾意食嘅嘢都只可以限量品嚐嗰陣，就快80歲嘅佢好似個細路仔冇得食糖咁，個樣一臉可惜。
紅燒肉除咗係陳日君鍾意食嘅食品之一，更加係佢嘅撚手小菜。佢之前幫教區視聽中心做咗一輯《樞機廚房》，入面有教大家整紅燒肉，煮起上嚟仲有板有眼。
《品味人生》節目今晚7點半會喺亞洲電視本港台播放，香港電台網站同一時間會有視像直播，一連九集，其餘嘉賓包括壹傳媒集團主席黎智英。