申訴專員較早前炮轟運輸署官僚兼因循，小巴仲要拖多八年至裝晒安全帶，唔理乘客死活。但係原來凡事拖一拖，係運輸署嘅作風嚟嘅，而且一視同仁，唔單止小巴乘客，尊貴嘅議員一樣要等。
運輸署次次話研究吓
話說2000年立法會港島區補選時，當時嘅區議員黃仲棋揸住宣傳車，載劉千石同李卓人企喺後座嗌咪，喺鴨脷洲四圍兜，為候選人余若薇拉票。點知被警方票控，話劉千石同李卓人冇戴安全帶，罰款1000蚊，呢次係首次有拉票車企人被控。到咗03年，運輸署就連六四遊行開路車都唔准企人。
議員於是不斷要求政府放寬，運輸署05年終於修例，但只係放寬遊行嘅車可以企人，拉票車依然唔准，議員當然唔滿意，於是運輸署又話返去研究吓。
如是者眨吓眼2010年年尾都嚟緊，運輸署終於有結論，就係拉票車唔似得遊行車咁，慢慢行又有固定路線，外國亦冇先例，所以基於安全理由，決定維持原判，拉票車唔可以企人。睇到呢度，相信各位都要學柴九哥講番句：「十年！人生有幾多個十年！」