前晚何韻詩在灣仔伊館開騷，她以一身紅色格仔菇頭造型出現，並效法同性密友容祖兒（Joey）在台上點唱，歌迷更群起大叫Joey的名字，不過阿詩竟倒米說：「呢啲細騷仔，使乜鬼睇。」提起兩隻已過世的愛貓時，她即感觸得眼泛淚光。
何韻詩前晚到灣仔伊館為一連四場的「HOCCComingHomeLive2010」演唱會揭開序幕，吸引黃耀明、汪明荃、黃偉文及藍奕邦等到場，雖然今次阿詩選擇在較細場地表演，但全場歌迷都很快high爆，唱到第二首歌便全站起來，不過有幾名男觀眾卻睇到瞓着，認真失禮。
阿詩前晚出場就以一身紅色格仔菇頭造型示人，全晚氣氛熱烈，她除了獻唱自己歌曲外，又重新演繹別人的歌，當唱出近日熱爆中港台的台灣電音天后謝金燕首《嗶嗶嗶》時，即時掀起全晚高潮，阿詩也high爆，走落台與歌迷握手。
憶台灣重新出發
阿詩感激歌迷容許她繼續任性地做自己喜歡的音樂，又效法容祖兒早前個唱，讓歌迷即時點唱，她說：「諗起聖誕歌，我就諗起一個偶像。」台下歌迷即時大呼Joey名字，不過戴上耳機的阿詩就懶理歌迷叫囂，並唱了幾句郭富城的聖誕歌。
其後阿詩有感而發表示之前離開香港半年到台灣發展，並說：「去沉澱感受自己，重新出發。當中會有迷失、感受到身邊嘅愛畀自己力量走下去，亦失去一啲嘢。面對失去，唔開心？難過？定係重新向前走？呢個係生命上必上一課，希望我嘅經歷融入歌裏，喺大家失去、唔開心時畀到大家力量。」由於之前阿詩先後經歷了兩次喪貓之痛，所以說話時即感觸得眼泛淚光，更險些喊了出來。
認抄祖兒玩點唱
阿詩接受訪問時直言是參照Joey的點唱環節，但她就自稱是窮歌女，所以未能加長點唱時間，她說：「超時分分鐘幾十萬上落，呢度11點44分就要放低支咪同收口喇。」她透露Joey將會於日內來欣賞其個唱，更倒米說：「呢啲細騷仔，使乜鬼睇。」
採訪：李珮洳
攝影：陳志嵐