愛丁堡未變白色恐怖　靚到Warm入心

愛丁堡未變白色恐怖　靚到Warm入心

香港人一直夢想的白色聖誕，向來只能遠走歐洲實現！諷刺的是今年聖誕太白色恐怖了……好彩好彩，我是11月下旬到愛丁堡，冷但未見雪，當時嘆可惜，現在則珍惜自己能提早過了一個好warm的傳統聖誕！

記者、攝影︰吳美美
鳴謝︰維珍航空、VisitBritain英國旅遊局

真人吊上樹頂做裝飾！

由愛丁堡回來，明白晒！終於知道點解有人寧願捱貴機票貴酒店，都要飛往歐洲度聖誕，以前肯定笑人媚外崇洋大把錢，家陣先明有啲錢點都要俾人賺，救命！在愛丁堡親身體驗過攞正牌的快樂聖誕，我諗，我返唔到轉頭啦！就算香港商場搞到個大門口又金又銀又煙花，節日氣氛依然一直淡，無計，鼓吹落力消費多過慶祝節日的動機太明顯，大家搵時間排隊買潤手霜多過佈置聖誕裝飾，純粹MerryX'mas？諗你都唔好諗。
請唔好誤會小記力撐的愛丁堡過聖誕，會幾咁特色花巧，人哋講的是傳統，只不過今年有特備環節點綴一下。人家的聖誕都是提早一個月前已做足準備，今年11月25日，是他們聖誕樹亮燈儀式、德國傳統market及HighlandVillageMarket（至明年１月４日）齊齊倒數聖誕日子，其實仲有好多活動排住隊，例如扮聖誕老人齊齊跑圈等，好可惜小記第二日要走啦！
算啦，珍惜眼前最重要。年年位於TheMound的聖誕樹都會有亮燈儀式，但今年背後有深層意義，它原是挪威HordalandCountyCouncil送給愛丁堡的禮物，以象徵由二次大戰開始兩地之間歷史與文化的聯繫，2010年正好是25周年紀念。
5時15分亮燈儀式開始，但之前已聚集成班愛丁堡人上山觀禮，最矚目一part當然係八位仁兄一路由山腳奏樂至山頂，繼而再吊至樹頂，仲一路奏樂一路表演「單槓」，突然藍光一着！煙花一爆！禮成！

■兩位莫斯科姑娘之前唔知呢度有聖誕party，所以見到時特別興奮。

■由德國market望過去遊樂場，靚到假。

■奏樂男由山腳行到山頂再吊上樹頂，仲係一路奏住樂，肯定攰到癲！

■Jun同Lydia由挪威過嚟。

■呢兩「支」「X'masCracker」周圍撩人影相，好搞笑！

■平時條街人氣無乜，究竟啲人喺邊到變出嚟？

■其實煙花簡簡單單仲靚，無人配音仲正。

a　位置︰TheMound,Edinburgh
備註：聖誕樹活動至12月底

食食食!朱古力辣椒

同成千上萬的市民逼完後，肚餓是必然現象，仲唔橫掃德國傳統market(b)擦小食咩！入夜後越來越多人，排隊排到我好肚餓呀！我的搵食路線圖是︰

熱選1︰X'masBallchen約$30

■第一年參與的Matte，全場笑住做，下年肯定又見佢。

■沙翁熱住食一定無敵，面頭可選擇醬料，我就要咗呍呢拿。

熱選2︰KASE約$42

■可稱之為德式pasta，無加任何肉類，只放了芝士、炸洋葱及檔主秘方，食落creamy又飽肚。

■阿Pad第六年在此開檔，每年都做得好開心，明年繼續。

熱選3︰FiredPunch約$60

■勁熱的紅酒加了rum及糖，飲完真係成個人暖晒，而隻杯你飲完可拎番去檔口退番兩鎊。

■大大隻煲又圍住熱氣，望到都覺得warm。

熱選4

■你睇佢連朱古力辣椒都有先至嚇親。約$12

■朱古力香蕉約$24

■單睇佢賣朱古力配士多啤梨無乜特別？

玩玩玩!企鵝陪溜冰

有嘢食有show睇，又點會無得玩呢？隔籬的HighlandVillageMarket(c)及山下面都有機動遊戲、溜冰等俾你玩，憑心講句，自命要玩機動遊戲玩到XGAME嘅人千祈唔好嚟，怕你見到兒童適宜的遊戲感失望，摩天輪、飛天韆鞦、咖啡杯，擺明就是要你童真回歸，乜唔係細個時過聖誕係最開心嘅咩？

■除咗食買玩，場內仲有西洋睇相。

■跳樓機，不過最多三層樓高。

■最刺激都係跳彈床！

■摩天輪、咖啡杯，就是要你童真回歸。

■有埋Wii任玩，傳統得嚟都與時並進。

■冬天溜冰無咩特別？你睇這位小姐拎住個有助企穩的企鵝先至係重點！

特備環節︰任食吉百利

呢間小屋係吉百利朱古力推廣「Wishes」活動，可以入內任食朱古力之外，仲可以畫出心目中設計，無意思逼你捐錢，但出嚟後都用$24買了兩個慈善限量版星形朱古力。

■慈善版星形朱古力約$12

■喺吉百利小屋，可以畫出心目中的朱古力設計。

■仲有朱古力任食!

MerryChristmas

溫馨提示：往愛丁堡或英國前，可以上網到 http://www.visitbritainshop.com睇吓，呢度有百多種有關旅英時用到的產品和資訊，如今次我成日坐的觀光巴士等。

TravelMemo

持BNO或特區護照毋須簽證。英國領事館：29013000

乘維珍航空由香港經倫敦往愛丁堡，經濟客位來回機票由$7,340起。維珍航空︰ http://www.virgin-atlantic.com

1英鎊（GBP）約兌12港元（文中價錢已折算港元）

240V，三扁腳插座

英國愛丁堡

下周有雪，0-5℃