榮升總主教嘅韓大輝神父下月出發去梵蒂岡，了解一下新工作環境。作為陳日君樞機愛徒，自然深得老人家歡心。佢話陳樞機知道佢做咗萬民福音部秘書長後，話無論心靈與身體上，都會全力支持佢，仲問韓神父夠唔夠錢使，事關全世界都通脹，意大利物價咁貴，驚佢去到要節衣縮食。
陳樞機盛情難卻，韓神父當然多謝夾盛惠。佢大讚陳樞機一直好照顧佢呢個徒弟仔，對佢關心無微不至。佢話如果喺梵蒂岡舉行擢升儀式，叫八方可以試吓問陳樞機能唔能夠包機票咁話。
韓神父家仲設計緊個新牧徽，因為湯漢都只係天主教香港教區主教，韓升咗總主教之後，按教會內嘅階級仲高過湯主教，所以牧徽都要有區別。