我哋中國人好鍾意講「年關難過」，2010年兩個烏拉圭足球英雄科蘭、泰巴利斯就喺年尾分別掛彩，一個長期征戰之下終於頂唔順受傷，另一個就破財，慘！
世盃至今半年踢31場
科蘭係喺前日西班牙盃16強首回合，馬德里體育會主場對愛斯賓奴場波扭傷足踝。佢今年夏天協助烏拉圭殺入世界盃4強，自己又贏埋賽事最佳球員，威水就威水啦，代價係踢波踢到氣咳，又因為攞獎攞到手軟、應酬多多。同佢計過數，由半年前6月11日世界盃對法國場波計起，佢合計踢咗31場正式比賽，中間只有7月中至8月尾唞暑，真係鐵打都死。
會方似乎都察覺呢位31歲射手疲態畢露，早排聯賽對拉科魯尼亞同埋歐霸對利華古遜都唔使佢踢足，到中後段換走佢，到禮拜日作客馬拉加場聯賽更加擺佢喺後備，令佢今季第一次聯賽缺陣。不過人算不如天算，佢喺前日場西盃受傷，暫時未知要唞幾耐。
呢場西班牙盃，馬德里體育會以1:0打敗愛斯賓奴，令當日慶祝60歲生日兼喺球場進行婚禮嘅愛斯賓奴會長掃興，而最煽情奠勝球員係隊長沙保沙，賽前已有消息指佢將於下月改投比錫達斯，臨別秋波射入一球12碼，別具意義，難怪下半場離場時得到球迷起立歡呼喝采。
烏圭教頭被盜巨款仲傷
講番烏拉圭今年另一個英雄，以教練身份帶領「烏圭」入世盃4強嘅泰巴利斯（圖）一樣「受傷」，事關烏拉圭警方證實佢嘅個人資料被盜用，08年至今個銀行戶口被人逐啲逐啲提款，據報個數目高達50萬美金。最傷仲係據講事件同唔知係泰巴利斯家姐或細妹加埋老公，再同一個泰巴利斯工人合謀，畀自己人出賣，佢可能傷得比科蘭更深喎。
