大陸傳媒噚日鋪天蓋地，話尚福林揸fit嘅中國證監會，將會雷勵風行咁執法，樣樣都要嚴管。佢哋第一樣要嚴打嘅，就係網絡上面以薦股為由嘅詐騙行為！即係要郁手清理俗稱「黑嘴」嘅股評人，而且仲已經實行「拉人封舖」！
根據中證監噚日公佈嘅數字，原來由09年至今，已出手拉咗成千人。而中證監仲特別點名「關心」新浪、搜狐、網易同和訊呢啲網站！
網絡詐騙 經濟損失120億
咁呢啲「黑嘴」做咗啲咩會畀人拉呢？其實手法都係大同小異，透過唔同嘅媒體推介股份，之後就進行所謂嘅「搶帽子」交易（即係炒即日鮮），又或者做下「庄托」（即係出口術嚇走散戶，之後自己就低位買入）等等。鬼咩，佢哋話今年上半年，網絡詐騙已經造成120億人民幣嘅經濟損失，仲唔嚴打真係唔知點收科嘞！
除咗股評人同埋網站之外，中證監仲順便整頓埋證券投資諮詢機構，佢哋2009年度年報嘅年檢已經完成，總共有91間參加，86間通過，5間「肥佬」，而當中有15間要整改過之後先至pass到！咁都未算，聽聞佢哋仲會加強保薦人代表人盡職調查嘅管理，會約吓保薦人詢問盡職調查嘅工作情況……
咁忙咁多嘢做，唔知尚福林有無諗過，叫我哋嘅「打虎英雄」韋奕禮約滿之後，上去幫吓手呢？
李華華
電郵：mailto:[email protected]