愛一個人過了火，隨時惹到周身蟻。幾年前轉行做公關嘅亞視前新聞之花繆美詩（Rachel），過去五年來俾一個癡男糾纏，經常等佢返工放工。癡男近排仲喺七個星期內向Rachel發出咗650幾個手機SMS，內容雖然唔涉及性，但就非常肉麻。Rachel頂唔順報警，噚日法院判佢電話滋擾罪成立，要自簽2,000蚊擔保同守行為12個月。
跟足五年狂發SMS
Rachel喺領匯做咗五年，舊年先起身離開，佢最難忘嘅未必係工作，而係一個喺屋邨商場開茶餐廳嘅癡男。Rachel話，癡男喺05年底就開始跟住佢，無論返工放工、出街食飯、做gym，總之跟得就跟，仲越跟越開心，越開心就越出位。佢當時返工會將架車泊喺領匯近嘅停車場，點知有一次俾人用噴漆噴咗「我愛繆美詩」五個大字，擺明示愛。
俾人跟住嘅感覺唔慌會好，Rachel話最危險嘅，係呢位先生為咗跟貼啲，揸車嗰陣衝紅燈、cut雙白線。Rachel話報警超過10次，不過警方話冇真憑實據，加埋跟蹤唔算犯法，所以想幫都冇得幫。
離開領匯之後，Rachel今年7月自己開咗間公關公司，搬咗公司之餘又搬咗屋，點知癡男轉用SMS攻勢，今年9至11月喺七個星期內仲無分日夜向佢發超過650個SMS，內容大致係想同你一生一世、好掛住你呀之類，搞到Rachel冇覺好瞓。
「都仲係咁鍾意佢」
Rachel終於再報警，癡男噚日出庭受審，結果觀塘裁判法院判癡男滋擾罪成。46歲、報稱商人嘅癡男馬健亮獲准以自簽2,000蚊擔保，守行為12個月，並要承諾唔再滋擾事主。不過，法庭判決冇改變癡男嘅情感，佢喺庭外話：「見到佢（繆美詩）我腦海就一片空白……都仲係咁鍾意佢」。癡男離婚約七年，佢話以前喺電視新聞見到Rachel已對佢有好感，欣賞佢嘅外形、笑容同口齒伶俐。他話05年已對Rachel一見鍾情，到家仍然冇變。
Rachel知道判決之後都未敢鬆一口氣，佢最驚係癡男12個月之後又故態復萌，又再嚟過。
mailto:[email protected]