中小克聾貓毒已深，相信海洋公園內的熊貓都是人扮，因太多人反映佢哋唔識郁兼走得勁遠，從未能驗清真假！但基於我對熊貓癡心一片，癡感動天，香江野生動物世界的大熊貓中心，將「亞運熊貓」集齊一打置於館內，其中半打是BB來的，見到佢哋移動時真係cute爆，平安夜睇熊貓，滿足過食聖誕餐！
記者︰占占美
攝影︰陳君君
Model︰Reila@Starzpeople
鳴謝︰康泰旅行社
120歲最長壽熊貓
未出發，先興奮，呢種感覺只有熊貓先畀到我，身為die-hard粉絲，坐兩個幾鐘車同船阻唔到我對熊貓的熱情。一踏入香江野生動物世界就光速步伐走去「大熊貓中心」。依山而建的中心，為了12隻亞運大熊貓而建造，當中6隻剛由四川搬過來，都只有一歲大，包括好好、運運、銀柯、津柯、紳威及博斯，因牠們還未懂性，仍處於「熊」未變「貓」的狀態，成日想搵人陪佢玩，所以餵飼員照顧pandababy時都有點危險性（完全諗唔到熊貓可以點危險）。另外，4隻同是05年出世的友友、慧慧、婷婷及耀耀，正值青春期，要pandaboy同pandagirl就靠晒佢哋，最後兩隻是全世界最長壽的冬冬及明明，分別是74及77年出世，以人的年齡比例換算，足足有120歲。
共四個館的大熊貓中心，分保健中心、翠竹園、紫竹園及金竹園，其實純粹是室外室內之分，反正熊貓們先係焦點，嘻嘻，我先走去睇6隻pandababy，可以用周圍搞、無時停嚟形容，真的交足戲，舉手投足都係cute到想跨欄入去攬住佢哋，有打交、爬梯、碌地沙，「表演」多元化，講真，口口聲聲身為熊貓粉絲的人，就算花兩個幾鐘搭車又搭船係完全值得囉。
純粹入場睇熊貓好似幾dry，俾埋你餵好唔好？但呢種「禮遇」只限參加康泰團團友，但請留意亦唔係個個有份，名額有限，先到先得。最開心係modelReila，因為今次係佢負責餵熊貓，不過佢就將個蛋糕掟中熊貓個頭，搞到熊貓怒睥佢囉（網上有短片為證！）。
1.熊貓蛋糕有竹粉、蛋、麪粉、黃豆粉、營養素等，將所有材料攪埋一齊，加水攪勻。
2.將粉糰倒入心形模內壓實。蒸兩個鐘後就搞掂。
3.Reila正要拋出愛心蛋糕，點知……熊貓中頭獎！
必買熊貓色毛毛足球
身為「愛死熊貓die-hard粉絲團團長」，唔去掃熊貓精品就真係講唔通。入到門口，已經被一整排熊貓公仔脅持，再掃過去，手袋、散紙包、電話繩，再行落去真係好大鑊，而小記最鍾意的熊貓色毛毛足球就點都要買埋。
同場必探
企定定睇水哥
可能12隻熊貓太艷光四射，所以為了響應世界盃而邀請由非洲土生土長的獴，及二月份時開放的白虎山，影響力即時被減弱。又名非洲哨兵的獴哥，得名原因是經常於非洲草原企定定唔郁視察環境，極似守衞，我就鍾意叫佢「睇水哥」。開館時引入30隻，經過半年時間已有兩隻獴哥BB出世，恭喜晒！
震騰騰老虎B
對老虎，我麻麻鍾意，特別是大大隻成年老虎更無好感，不過，去白虎山見Reila抱住隻老虎BB時，見佢驚人時震騰騰個樣又OK可愛，心目中係加分的，順帶一提，咪以為個個都可以抱老虎BB，遊園人士一律無機會，今次純粹例外俾傳媒影相。白虎山內的白虎戲水園，定時還會有白虎跳水表演。
$349白虎餐廳Buffet
極近香江野生動物世界的長隆酒店，今年的聖誕、平安夜於白虎餐廳內都有節日自助餐，每位$349，由於客人數量不斷上升，今年的座位數目已由三百加至一千，唔怕節日要摸門釘。
香江野生動物世界
地址︰廣州番禺區大石
廣州 明日有雨，6-14℃
