時間係唔等人嘅，當年靚爆鏡上位嘅MaggieQ眨眼已經31歲，由索女變中女。平日鏡頭前嘅佢雖然仲好性感美艷，但冇化妝就係另一回事，日前MaggieQ完成美劇《墮落花》（Nikita）嘅拍攝，準備返老家過聖誕節，喺多倫多機場出現時，素顏嘅佢大走樣，花容大崩壞，都咪話唔嚇人！
滿面油光欠緊致
當日MaggieQ戴帽、一身深沉色打扮，冇搽粉嘅佢滿面油光，法令紋極深，肌膚略欠緊致，同向來眉梢眼角風情無限嘅形象差天共地，不過Maggie係不拘小節嘅ABC，所以都唔介意走樣上鏡，佢仲手持一張聖誕快樂嘅紙牌，俾fans任影唔嬲，表現親民。
近年MaggieQ主攻外國市場，之前佢主演嘅《墮》劇美國首播收視稱冠，MaggieQ扮性感女殺手好打又養眼，頗受老外歡迎；加上佢又愛情得意，早排被影到同「嫩版畢彼特」男友喺洛杉磯嘅市場買菜，又拖又啜，好鬼sweet。事業愛情兩得意嘅MaggieQ怕且得意忘形，唔知係疏忽臉部保養定係懶得化妝，先搞到走樣人前。
家陣潮玩神奇化妝術，四層眼睫毛配大眼仔，係女人都可以變正妹。踏入呢個變臉年代，MaggieQ都要change，只不過佢示範嘅係反面教材，上演另類變臉。