如無意外，球王美斯應該好難贏到下月初公佈嘅金球獎，而佢日前先受一個小挫折，就係失落由阿根廷傳媒選出嘅國家全年最佳運動員獎，輸俾女子曲棍球艾瑪爾（LucianaPaulaAymar、圖），不過諗深一層，查實美斯被呢位曲棍球天后擊敗好合理，話晒艾瑪爾今年為阿根廷贏咗兩個大賽，絕對係好波之人，加上雖然佢已經33歲，但樣靚身材正嘅佢keep得好，近年拍唔少性感照，連雜誌《花花公子》都想打佢主意搵佢拍裸照，喺外國人氣爆燈。我哋香港體育迷唔熟佢，只因曲棍球唔算係我哋主流運動啫。今年唔能夠幫阿根廷喺世盃取得好成績嘅美斯，確係要靠邊站。