新聞女主播吸引唔少粉絲，但往往因粉絲過度迷戀而被騷擾。繆美詩多年前係亞視報新聞時，就被人用電話性騷擾。Rachel記得02年有一日，她入廠報新聞，只不過短短20分鐘，就有90幾個未接電話，同時亦有大量留言，一聽發現，全部都係一個男人聲嘅鹹濕或涉及性嘅留言。由於個男人係用鬼卡打畀佢，Rachel報警但結果拉唔到人。
有人直闖now求見
至於now新聞台，試過有一位疑似精神有問題嘅男人，有日去到now嘅灣仔總部樓下，話搵人就過咗樓下保安一關，上到三樓，差啲就跟住職員尾走入新聞台大鬧，好彩形迹可疑俾人截住。擾攘期間，佢不停話要見主播，男女通殺，畀佢點名嘅包括「小飛俠」林燕玲同李臻。
另一位現役女主播，聽聞年幾之前曾經收到一封求愛掛號信，信中有隻鑽石戒子同一封要同女主播結婚嘅情書。女主播將情況稟告上司，老細一睇，首先鑑定鑽戒係真嘢，亦跟手將信件同物品退番畀寄信人，拒絕咁嘅求親。女主播生得靚自然多粉絲，不過出現咁嘅狂蜂浪蝶都好惡搞。