近日再讀資深證券分析師林森池先生3年前著作《平民資本家》一書，感覺歷久常新，該書出版之際正值市場準備熱炒港股直通車，股市泡沫快速膨脹，人人沉醉於抽新股IPO與直通車概念股，當時金融市場已瀰漫着一片山雨欲來，美國樓市次按危機，及其即將引爆的一場金融海嘯。已很久未有再見林先生，但原來他著書立說的一番真知灼見，教導讀者如何運用基本分析方法化身伯樂，精挑細選出企業中的千里馬，低買高不賣，高買更高也不賣，長線投資回報肯定會好可觀。
內地抗拒以加息調控經濟，負利率加上熱錢流竄推高通脹令資金不得不為保值而大費周章，辦法離不開泊至磚頭、股票及商品資產。
內地樓市炒風雖然經歷中央連環出招二輪打壓，樓價卻唔只跌唔落反而更異常硬淨，呢種情況亦同樣出現於香港，樓價一樣跌唔落，議價空間卻增加，用家主導之餘，因為銀行利息太低，負利率現象持續。
投資股票錢搵錢
具實力投資者根本唔介意畀足5成首期，投資者眼見仍較齋存入銀行回報理想，入市態度唔會受太大影響，揸兩年亦唔係問題，反正供求因素支持，放租一年生約一年死約話咁快兩年過去，不受打擊炒樓措施影響。只是如果手上無磚頭嘅打工一族，明知在資本家當道話事嘅世界作為打工仔無甚議價能力，要由被剝削的一群化身成資本家，成為你老闆嘅老闆，途徑只有一個，就係成為佢哋股東，打唔低佢就要擁有佢，與其日日等運到等加人工，倒不如將自己變成佢老闆。
資本主義社會資本家話事，要話到事就要變成資本家，你可以買入好多家企業嘅股票，變相成為一盤盤生意，股神畢菲特亦係以同樣方式致富。買股票錢搵錢好過打工，關鍵係點樣買及幾時買及買啲乜。
胡孟青
獨立股評人