民主黨四面受敵，成批少壯派黨員早前退黨，噚日仲俾一班網民唱衰。幾十個選民力量成員，噚日租咗架城巴由尖沙嘴慢駛去九龍塘，用報聖誕佳音嘅方式，大唱改咗歌詞嘅聖誕歌，唱衰民主黨，有一首改自JingleBells：「民鼠黨過年年年維園擺晒陣同諸君許下雙普選的抗爭同香江發言明知畀佢㩒全家捐了一千蚊畀咗班光棍」，句句夭心夭肺。
讀緊調解課程
選民力量原本仲整咗張寫有「政改爛方案唱爆民主黨」橫額，但城巴以太針對性為由，唔准掛喺巴士外，最後佢哋改咗寫成「2011票債票償」，叫啲選民唔好再投票畀民主黨。
同樣係後生仔，民主黨黨員比較之下顯得好斯文。黨內一班後生仔組成嘅「民主青年」，早前派人選黨中常委，當選中委噚日公佈發展大計。成員林立志話，未來希望拉多啲年輕人入「民主青年」，早前已同正生書院搞過wargame，嚟緊亦會搞聖誕派對。佢又引用馬草泥名句話做嘢唔會夾硬嚟，「唔會強迫人做唔情願嘅嘢」。
另一成員趙家賢就話，唔少「民主青年」成員讀緊調解課程，諗住幫街坊做和事佬，調解包括感情問題在內嘅糾紛。