金管局總裁陳德霖苦口婆心叫大家唔好因為存款息低，按揭息率又處於低水平，就撲去入市買樓。不過，如果有樓喺手又好唔好趁高價賣咗佢呢？
前幾日，敏妮放工返屋企時，突然收到公關V電話，「敏妮，如果層樓到價，好唔好賣呀？」公關V唔怕敏妮係「明燈」，經常問敏妮有關投資嘅意見。既然佢咁信任敏妮，即管好好同佢分析。
低息環境 揸資產勝資金
公關V年初終於得償所願「上車」，由於budget有限，所以揀咗層唔大，但交通方便，位置近商業區嘅舊樓收租，諗住以租金冚樓按供款，供到咁上下就換樓，直至換到心儀嘅就用嚟自住。
佢話層樓到價，問家陣好唔好沽。首先，敏妮問佢層樓收租回報有幾多？「大概6厘。」咁租約係咪就嚟到期？「仲有成年先到期。」賣咗有冇其他投資可以有6厘回報？「咁又冇。不過，我反咗幾次價，個客都肯接，但就話家陣呢個已經係終極價。你點睇？」原來嗰位準買家，都係因為公關V層樓租金回報理想，買嚟長線收租。
市況波動，存款息率仍然低企，通脹情況不斷惡化，喺呢啲環境，揸資產點都抵過揸資金。何況聽公關V講，層樓雖然樓齡有30年，但已經做咗一次大維修，而租客雖然有時遲咗交租要催，但從未試過拖欠唔交。
同樣風險嘅投資，回報未必有6厘。單睇接貨買家都覺得，即使用更高價錢買層樓返嚟收租，回報仍然吸引，呢位接貨者唔係抱短炒心態追貨，佢嘅諗法應該有參考價值。
投資追揸沽點部署，從來都係計數，中短期冇其他投資提供相同甚至更好回報，只係考慮樓價下跌風險，而樓價短期暴跌風險相信有限，所以敏妮嘅意見，係繼續收租。
溫敏妮
http://wanmanli.com/blogs/