述職得相當開心嘅煲呔，噚日繼續帶住部iPad喺北京四圍走。有啲唔同嘅係，佢去見老頂級嘅溫總同港澳辦主任王光亞時，就搵番個好傳統、夾住紙張文件嘅快勞，唔通知道咁樣比較認真啲？不過見級數高唔過自己嘅部長，就攞住呢部潮人玩具係咁又篤又捽。
話說煲呔噚日上晝拜會商務部部長陳德銘，陳德銘見煲呔晒住部iPad就食住呢個話題，話iPad嘅價格中港兩地差異極大，初初運到香港時成萬蚊一部，後來跌價到四千幾，佢自己就喺美國都買咗部，16G賣399蚊美金，但國內就企硬五千蚊。見到咁嘅對答，好明顯陳部長都騷緊quali，反映佢對iPad嘅商務情況完全掌握。