華叔今個聖誕喺醫院度過，但一啲都唔寂寞，因為逾廿幾位支聯會、民主黨同教協成員同埋佢嘅家人，噚日專程去醫院開聖誕派對，得華叔不知幾開心，尤其成班人連續唱咗幾首聖詩後，華叔更笑得好燦爛，有啲聽出耳油要encore咁款。
話明係派對，當然有嘢食，支聯會副主席李卓人就帶咗個蛋糕做禮物，人人有份，亦有人帶咗香檳當場飲番杯。最令人意想不到嘅係有特備節目，就係聖誕老人現身，據聞支聯會一早準備咗一套聖誕老人衫同白鬚，去到就起哄屈咗李永達「易服」，阿達亦好落力演出，為現場增歡樂氣氛。華叔噚日都睇咗國殤之柱搬遷嘅片段，仲祝出席友好以及所有市民身體健康。