面對新加坡同澳洲交易所合併，港交所（388）當然唔可以坐喺度咩都唔做。噚日佢哋公佈，請咗納斯達克OMX亞太區總負責人藍博文（EricLandheer）過檔，出任港交所市場發展科高級總監兼上市推廣部主管。Eric會喺出年2月1號履新，向市場發展科主管羅力滙報。
近年港交所負責上市推廣嘅主管，係老臣子霍廣文，但係李小加上場之後，今年3月宣佈重組架構，霍廣文調咗去做業務推廣總監，上市推廣主管個位就一直懸空。港交所近年力吸內地公司嚟上市，搵個外國人做上市推廣掂唔掂o架？
據港交所公佈，呢位Eric雖則嚟自花旗國，但係就識講普通話，過去3年亦都長駐香港，主理納斯達克有關上市推廣同公司關係嘅工作。雖然唔係中國人，但係去內地推廣都應該冇問題嘅。Eric之前喺納斯達克駐美國加州同駐倫敦，都係主責推廣公司上市，所以要佢幫手搵生意，應該難唔到佢嘅！