去咗北京述職嘅煲呔前晚同習近平喺釣魚台國賓館撐枱腳，食乜都應該好滋味。留喺香港做署理特首嘅唐唐亦唔憂冇好嘢食。唐唐噚日落區視察北角，專程走去賣雞蛋仔賣到街知巷聞兼上晒報紙嘅小食店，嘆番幾底雞蛋仔，仲同店主吹水friend吓玩親民。
間雞蛋仔店來頭唔細，食家蔡瀾同埋憑《義海豪情》劉醒一角獲封視帝嘅黎耀祥都係捧場客，所以話唐唐係「食家」，一啲都冇講錯。講番唐唐落區，係去睇前北角邨嘅地盤規劃同港島東海旁研究。話時話，北角邨塊靚地丟空十幾年，早年就用嚟做臨時停車場，之後話搞跳蚤市場但觸礁，下年度終於話會勾出賣地，真係波折重重。