本港青少年吸毒問題一度惡化，舊年煲呔一聲號令，多個部門齊齊出手打壓，問題睇嚟改善咗。又到聖誕，警方除咗繼續出動打擊，仲諗到新招，毒品調查科首次同教會合作，出年起喺全港126間天主教教區中小學，推出為期兩年嘅「網上學習及多元化禁毒計劃」，向近10萬名師生灌輸禁毒訊息，係毒品調查科歷來最大規模嘅宣傳教育project。
負責計劃嘅調查科總督察范楚芬同八方講，學生要喺兩年內上8堂，除咗一般毒品認識同禍害外，仲會播吓青少年過來人現身說法嘅錄影片段。又會喺每節課堂測試學生，睇吓佢哋吸收到幾多禁毒訊息，但係強調唔會乘機問學生有冇吸過毒呢啲敏感問題喎。