「維園阿哥」任亮憲捲入非禮強姦案，搞得政壇滿城風雨，一向關注女性權益的民主黨副主席劉慧卿噚日話，早前替該黨「小百合」鄭莉莉讀出聲明澄清，事後收到小百合電郵感謝。卿姐原本諗住請小百合食飯，問候兼安慰同支持，但係兩人因事忙食唔成，惟有出年再約，「但佢都知道我好撐佢，好支持佢」。
對維園阿哥冇感覺
卿姐噚日同傳媒茶敍時又話，民主黨性別平等督導小組今日開會，黨友提出有用意見無任歡迎，「唔只係女士，男士都可以講」。
對於維園阿哥案件，卿姐話不作評論，但就話唔單止從政人士，一般人都應該要潔身自愛，「個個都已經攞咗成人身份證，個個都要為自己行為負責」。卿姐就話只係喺維園見過一次任亮憲，所以對佢「冇感覺」，「咪人一個囉」。卿姐又話，嚟緊會叫多啲黨友落維園發言，只要事先做足功課，講嘢有理據，唔使怕俾啲只識大聲鬧人嘅人踩場喎。