呵呵呵！聖誕節就嚟到嘞，就連形象一本正經嘅證券商，都發表鬼馬報告，實行與眾同樂。里昂最近就做咗個調查，訪問咗100位國手，最過癮嘅問題，莫過於「你認為聖誕老人應該減幾多磅呢？」
有超過6成嘅醫生，認為佢應該減至少50磅！不過，照華華睇，聖誕老人（圖）咁「魁梧」，最起碼都要減300磅至算fit，減完50磅，都仲見到佢個壽包形大肚腩喎。
喺節日同班friend聚吓飲番幾杯好正常，受訪醫生都好明白，但有7成醫生就建議最多每日飲兩杯。喺新嘅一年，各位醫生亦提出咗啲保健建議，其中一項人人啱聽嘅，就係「人生苦短，大家笑多啲啦﹗」華華同大家共勉之！