華華噚日喺法庭入稟列表，發現有單case幾有趣，就係陸氏集團（366）全資附屬公司陸氏實業入稟高院，向莊勝百貨（758）追討500萬元人民幣欠款。
據陸氏喺入稟狀話，呢筆欠款其實早喺2001年已經借出，即係差唔多有成10年，貸款原訂1年期，年息9.5厘，即係應該喺2002年就要清還，點知一直冇咗件事。咁多年嚟，因為核數原因，莊勝一直有向陸氏發出確認借款文件，但係就唔知點解一直拖數。
陸氏幫佢計過，截至今個星期一，莊勝應付利息有成456.13萬元人民幣，咁即係連本帶利差唔多double。陸氏主席陸擎天近年忙於去越南發展，唔通佢最近至得閒醒起要追舊債？