今年話咁快就到年尾，唔少人都想趁新年計劃一吓未來，冇乜頭緒？不如搵高人指點吓迷津。中文大學旗下全球經濟及金融研究所，就請嚟14位國際級財金高人，喺出年1月16至21號，搞咗一個「全球金融菁英領導研討班」，5日半嘅課程，盛惠8萬大元！呢筆錢雖然足足可以讀個1年嘅碩士學位課程，但係原來唔係有錢就讀得o架！
中大全球經濟及金融研究所所長廖柏偉噚日就話，個研討班只會收大約30人，而且仲未正式招生，就已經有嚟自中港台，同新加坡嘅人申請。佢話會好小心揀學生，因為喺公營同私營機構，從事銀行、保險、金融等行業嘅高層管理同財務主管，先係主要對象喎。
任志剛：最好有交流
講到個門檻咁高，究竟個研討班有咩高人咁勁咁吸引呢？華華八到，呢14個高人係嚟自唔同界別嘅猛人，可以話係「星級」陣容，包括3位諾貝爾經濟學獎得主：歐元之父蒙代爾、斯科爾斯（MyronScholes）同莫理斯（JamesMirrlees）；嚟自監管機構嘅，就有中國銀監會嘅主席劉明康、香港證監會前主席沈聯濤、美國聯儲局前副主席科恩等等。
仲有呀，當然唔少得今年4月已經加盟中大，擔任工商管理學院名譽教授嘅金管局前總裁任志剛。另外，中大前校長、現任中投國際董事長劉遵義，同埋港鐵（066）行政總裁周松崗亦都係講師嘅陣容之列。至於課題方面，就包括全球經濟新發展、國際貨幣體制新形勢、人民幣國際化、資產價格泡沫，同埋金融衍生工具等。
任志剛就話自己主講都係濫竽充數，但就希望參加嘅學生可以同講者引發交流討論，唔係淨係坐喺度聽，咁即係要帶腦嚟上堂啦！
李華華
電郵：mailto:[email protected]